திருச்சிற்றம்பலம்

உரித்திட்டார் ஆனை யின்றோல் 
  உதிரவா றொழுகி யோட
விரித்திட்டார் உமையா ளஞ்சி 
  விரல்விதிர்த் தலக்கண் நோக்கித்
தரித்திட்டார் சிறிது போது 
  தரிக்கில ராகித் தாமுஞ்
சிரித்திட்டார் எயிறு தோன்றத்
  திருப்பயற் றூர னாரே.   1 
 

உவந்திட்டங் குமையோர் பாகம் 
  வைத்தவர் ஊழி யூழி
பவந்திட்ட பரம னார் தாம் 
  மலைச்சிலை நாகம் ஏற்றிக்
கவர்ந்திட்ட புரங்கள் மூன்றுங் 
  கனலெரி யாகச் சீறிச்
சிவந்திட்ட கண்ணர் போலுந் 
  திருப்பயற் றூர னாரே.   2 
 

நங்களுக் கருள தென்று
  நான்மறை யோது வார்கள்
தங்களுக் கருளும் எங்கள் 
  தத்துவன் றழலன் றன்னை
எங்களுக் கருள்செய் யென்ன 
  நின்றவன் நாகம் அஞ்சுந்
திங்களுக் கருளிச் செய்தார் 
  திருப்பயற் றூர னாரே.   3 
 

பார்த்தனுக் கருளும் வைத்தார் 
  பாம்பரை யாட வைத்தார்
சாத்தனை மகனா வைத்தார் 
  சாமுண்டி சாம வேதங்
கூத்தொடும் பாட வைத்தார் 
  கோளரா மதியம் நல்ல
தீர்த்தமுஞ் சடைமேல் வைத்தார் 
  திருப்பயற் றூர னாரே.   4 
 

மூவகை மூவர் போலும் 
  முற்றுமா நெற்றிக் கண்ணர்
நாவகை நாவர் போலும் 
  நான்மறை ஞான மெல்லாம்
ஆவகை யாவர் போலும் 
  ஆதிரை நாளர் போலுந்
தேவர்கள் தேவர் போலுந் 
  திருப்பயற் றூர னாரே.   5 
 

ஞாயிறாய் நமனு மாகி 
  வருணனாய்ச் சோம னாகித்
தீயறா நிருதி வாயுத் 
  திப்பிய சாந்த னாகிப்
பேயறாக் காட்டி லாடும் 
  பிஞ்ஞகன் எந்தை பெம்மான்
தீயறாக் கையர் போலுந் 
  திருப்பயற் றூர னாரே.   6 
 

ஆவியாய் அவியு மாகி 
  அருக்கமாய்ப் பெருக்க மாகிப்
பாவியர் பாவந் தீர்க்கும் 
  பரமனாய்ப் பிரம னாகிக்
காவியங் கண்ண ளாகிக் 
  கடல்வண்ண மாகி நின்ற
தேவியைப் பாகம் வைத்தார் 
  திருப்பயற் றூர னாரே.   7 
 

தந்தையாய்த் தாயு மாகித் 
  தரணியாய்த் தரணி யுள்ளார்க்
கெந்தையு மென்ன நின்ற 
  ஏழுல குடனு மாகி
எந்தையெம் பிரானே என்றென் 
  றுள்குவா ருள்ளத் தென்றுஞ்
சிந்தையுஞ் சிவமு மாவார் 
  திருப்பயற் றூர னாரே.   8 
 

புலன்களைப் போக நீக்கிப் 
  புந்தியை யொருங்க வைத்து
இலங்களைப் போக நின்று 
  இரண்டையும் நீக்கி யொன்றாய்
மலங்களை மாற்ற வல்லார் 
  மனத்தினுட் போக மாகிச்
சினங்களைக் களைவர் போலுந் 
  திருப்பயற் றூர னாரே.   9 
  

 
மூர்த்திதன் மலையின் மீது 
  போகாதா முனிந்து நோக்கிப்
பார்த்துத்தான் பூமி மேலாற் 
  பாய்ந்துடன் மலையைப் பற்றி
ஆர்த்திட்டான் முடிகள் பத்தும் 
  அடர்த்துநல் லரிவை யஞ்சத்
தேத்தெத்தா என்னக் கேட்டார் 
  திருப்பயற் றூர னாரே.

		
இத்தலம் சோழநாட்டிலுள்ளது.
சுவாமி:திருப்பயத்தீசுவரர்,அம்பாள்:காவியங்கண்ணியம்மை.10  



		

திருச்சிற்றம்பலம்